Þingmenn kjördæmisins og ráðherrarugl

Satt best að segja hafði ég ekki hugmyndaflug til að ímynda mér að hugmyndin um að flytja meginstarfsemi Fiskistofu til Akureyrar hefði hvorki verið rædd eða samþykkt í ríkisstjórn né í þingflokkum stjórnarflokkanna áður en hún var tilkynnt opinberlega. Enn síður hvarflaði að mér að ráðherra myndi ekki kanna lagalegu hlið málsins, jafn auðvelt og það nú er. Líklega verður dæmalaus klaufagangur ráðherrans málinu að falli - nema þingið taki málið úr hans höndum.
Það virðist í það minnsta vera talsverður áhugi hjá þingmönnum fyrir sambærilegum flutningum, sbr. þingsályktunartillögu sem lögð var fyrir þingið í ársbyrjun 2011. Þar var lagt til að Landhelgisgæslan yrði flutt frá Reykjavík til Keflavíkur. Hjá gæslunni starfa um 200 manns. Meðal flutningsmanna var Margrét Tryggvadóttir sem talar nú um hreppaflutninga á feisbúkk-síðu sinni og spyr hvort til sé „ … laus blokk á Akureyri sem hægt er að flytja starfsfólkið hreppaflutningum í?“
Oddný Harðardóttir, sem var fyrsti flutningsmaður tillögunnar, minnir á hana á sinni feisbúkk-síðu um leið og hún vekur athygli á grein Valgerðar Bjarnadóttur, þingmanns Reykjavíkurkjördæmis norðurs, sem segist (væntanlega sem þingmaður kjördæmisins) ekki hafa miklar áhyggjur af landsbyggðinni enda eigi hún „öflugan her þingmanna sem heldur hag hennar á lofti.“
Sex flutningsmenn tillögunnar sitja enn á þingi, þar af tveir í stjórnarandstöðu og þrír ráðherrar.
Talandi um þingmenn kjördæmisins. Vilhjálmur Bjarnason segist sem „þingmaður kjördæmisins“ ekki geta stutt tillögu um að færa hluta af starfsemi Fiskistofu úr hans kjördæmi. Sama segir Ragnheiður Ríkharðsdóttir sem segist sem „þingmaður kjördæmisins“ vera ósátt við málið.
Þeir eru víða „þingmenn kjördæmisins“ þegar betur er að gáð.