Hissari í dag en í gær!

Sigurður Ingi Jóhannsson segist undrandi á afstöðu almennings til frumvarps hans um lækkun veiðigjalda. Hann er helst á því að fólk skilji ekki málið eins og sjá má á þessum ummælum hans: „Ef við hefðum ekkert gert þá yrðu engin veiðigjöld á næsta fiskveiðiári. Vegna þess að lögin sem áttu að taka gildi 1. september næstkomandi eru óframkvæmanleg. Þannig að ef að undirskriftasöfnunin yrði til þess að það yrðu engin lög þá verða engin veiðigjöld.“
Ef það er þannig að lögin sem eiga að taka gildi 1. september nk. eru óframkvæmanleg vegna lagalegra atriða, þá má leysa það mál með tvennum hætti. Í fyrsta lagi að framlengja lögin eins og þau eru í dag um eitt ár og með óbreyttum veiðigjöldum og nota tímann til að leysa úr lagalegum flækjum. Í öðru lagi má leysa þá lagalegu hnökra sem ráðherrann segir vera á því að lögin geti tekið gildi. Þetta er ekkert mjög flókið.
Það er því til lítils fyrir ráðherrann að hóta almenning því að ekkert verði úr veiðigjöldum ef fólk lætur ekki af mótmælum, eins og hann gerði í kvöld.
Sanngjarnt veiðigjald sem tekur mið af arðsemi auðlindarinnar óháð rekstri fyrirtækjanna, er lykilinn að þeim hörðu deilum sem verið hafa um sjávarútveginn síðustu áratugina. Frumvarp Sigurðar Inga setur aukna hörku í þá deilu og gerir það að verkum að við verðum fjær því að finna ásættanlega lausn en nokkru sinni áður. Deilur á að leysa þannig að sem flestir geti við unað til framtíðar en ekki með þeim hætti sem lagt er til með veiðigjaldafrumvarp ríkisstjórnarinnar.
Þetta skilur almenningur í landinu öfugt við ráðherrann Sigurð Inga Jóhannsson sem á örugglega eftir að vera meira hissari á löndum sínum á morgun en hann er í dag.