Ár og einn dagur án Dorritar

Í dag er liðið ár og einn dagur frá því að Dorrit Moussaieff flutti lögheimili sitt frá Íslandi til Bretlands. Þótt oft hafi verið minna tilefni til veisluhalda og glasaglamurs á Bessastöðum fór þessi athöfn hins vegar fram í kyrrþey. Ástæða lögheimilisflutningsins var að sögn að koma forsetafrúnni undan því að greiða skatta á Íslandi.
En þjóðin er samt ánægð með Dorrit sína. Hún er skemmtileg og hress og ólöt að gleðja fólk með geislandi brosi sínu og framkomu sem heillar alla upp úr skónum. Dorrit virðist annt um íslenska þjóð og vill henni allt gott, fyrir utan að leggja í sameiginlegt púkk með sköttum af tekjum sínum og eignum. Hún vill að innfæddir sjái um sig sjálfa án hennar aðstoðar.
Þingmenn virðast líka yfir höfuð vera ánægðir með hana Dorrit sína þótt hún hafi hagað málum sínum með líkum hætti og vinir forsetans þegar þeir flúðu með peningana sína til Tortólueyja heimsins í aðdraganda Hrunsins. Þingmenn munu því flestir sýna hlýhug sinn til Dorritar á nýársdag þegar þeir sækja Bessastaðasambýlingana heim í árlegum fagnaði og lyfta glösum til heilla nýju ári.
Á kostnað innfæddra.