Litlu verðr Vöggr feginn

Embætti utanríkisráðherra er eitt veigaminnsta ráðherraembætti hverrar ríkisstjórnar. Vægi þess er afar lítið í stóra samhenginu og áhrif enn minni á heimavelli. Gunnari Braga Sveinssyni núverandi utanríkisráðherra hefur tekist að draga úr áhrifum utanríkismála meira og hraðar en forverum hans. Samskipti Íslands við umheiminn hafa sjaldan verið í sambærulegu limbói og undir verkstjórn Gunnars Braga. Hann lætur sig engu skipta hvaðan úr heiminum peningar koma til fjárfestinga á Íslandi, svo lengi sem þeir koma ekki frá löndum Evrópu þar sem lýðræði og mannréttindi eru þó virt. Það var og er Gunnar Bragi Sveinsson sem barðist og berst enn fyrir því að Þróunarsamvinnustofnun Íslands verði lögð niður. Sem þingmaður og ráðherra hefur hann blygðunarlaust gengið erinda harðsnúinna hagsmunahópa og það var hann sem öskrað sig bláan gegn kröfum kvenna um bætt kjör. „Hvar er kjarkurinn“, æpti hann úr ræðustól Alþingis og átti þá við kjarkinn til að berja niður kvennastéttir með því að banna kjarabaráttu þeirra með lögum.
Nú er það hins vegar talið honum til tekna sem ráðherra að setja sig upp á móti því að tilteknar hugmyndir innan Amnesty International séu ræddar, líkt og Íslandsdeild samtakanna vill að gert verði. Þessi afstaða er jafnvel sögð vísbending um að ráðherrann sé að vaxa mjög í embætti. Virtustu fjölmiðlar nefna þetta til vitnis um stórsigra ráðherrans og jákvæð afrek hans í embætti!

Litlu verðr Vöggr feginn