Ísland er aðhlátursefni um allan heim

 „Mat okk­ar í ut­an­rík­is­ráðuneyt­inu, sem jafn­framt er byggt á stöðutöku helstu sendiskrif­stofa Íslands og Íslands­stofu, er að til skemmri tíma hafi ímynd og ásýnd Íslands á alþjóðavett­vangi ekki beðið um­tals­verðan hnekki þrátt fyr­ir tals­verða ágjöf.“
Svo segir í svari utanríkisráðuneytisins við spurningu mbl.is um hugsanleg áhrif af birtingu Panamaskjalanna og þeirra hneykslismála sem þeim fylgdu.

„Það var hægt að greina nokkuð neikvæðan tón í umfjölluninni framan af …“ sagði upplýsingafulltrúi ráðuneytisins sem taldi áhrifin þó vera takmörkuð og lítil til lengri tíma litið. Í sama streng tók Jón Ásbergsson, framkvæmdastjóri Íslandsstofu, sem taldi umræðuna ekki hafa verið skaðlega. „Við lítum ekki á þetta mál sem hættulegt fyrir orðspor okkar eða ímynd,“ sagði Jón framkvæmdastjóri Íslandsstofu.

Afstaða utanríkisráðuneytisins og Íslandsstofu virðist byggð á óskhyggju einni og voninni um að alþjóðleg umfjöllun um spillingu í ríkisstjórn Íslands sé smámál sem ekki þurfi að hafa áhyggjur af.

Hjörtur Smárason, sérfræðingur í ímyndarmálum landa og borga, er á öðru máli. „Ísland er orðið lélegur brandari um allan heim. Blaðamenn hlæja. Áhrifafólk í viðskiptum hlær. Leigubílstjórar hlæja. Fólkið úti í sjoppu hlær. Það verður ekki auðvelt að endurheimta traust á íslenskum viðskiptamönnum og íslenskum stjórnmálamönnum. Það verður eingöngu gert með því að taka skýra afstöðu gegn spillingu og kjósa breytingar.“

Ráðherrar ríkisstjórnarinnar hafa orðið landi og þjóð til ævarandi skammar á alþjóðavettvangi og stórskaðað íslenska hagsmuni. Kjánalegar yfirlýsingar utanríkisráðuneytisins breyta þar engu um. ​
Við erum aðhlátursefni um allan heim og bætum heldur í brandarann en hitt.