Forsætisráðherra og kjararáð

Forsætisráðherra segist furða sig á hækkunum hæstu launa sem kjararáð hefur úrskurðað um. Hann er reyndar svo hissa að hann hyggst biðja kjararáð að útskýra fyrir sér hvernig á þessu stendur. En hvað ætlar forsætisráðherrann svo að gera?
Það er nefnilega frekar einfalt að útskýra ákvarðanir kjararáðs. Meðalráðherra á jafnvel að geta fundið út úr því sjálfur í vinnunni sinni hjálparlaust.
Kjararáð  starfar samkvæmt lögum um – jú, kjararáð. Úrskurðir kjararáðs eru því ekki hugdettur þeirra sem skipa ráðið, heldur eru þeir byggðir á lögum sem segja til um hvernig ráðið skuli taka ákvarðanir sínar.
Í 8.gr. laga um kjararáð segir m.a. þetta: „Við úrlausn mála skal kjararáð gæta innbyrðis samræmis í starfskjörum þeim sem það ákveður og að þau séu á hverjum tíma í samræmi við laun í þjóðfélaginu hjá þeim sem sambærilegir geta talist með tilliti til starfa og ábyrgðar.“
Í 10.gr. laganna segir m.a: „Kjararáð skal taka mál til meðferðar þegar því þykir þurfa og ætíð ef orðið hafa verulegar breytingar á þeim launum í þjóðfélaginu sem höfð skulu til viðmiðunar samkvæmt lögum þessum eða á störfum þeirra sem úrskurðarvald þess tekur til.“
Þetta þýðir m.ö.o. að kjararáði ber að taka mið af launaþróun í landinu hjá þeim sem sambærilegir geta talist í hverju tilviki fyrir sig. Þetta útskýrir t.d. hvers vegna kjararáð úrskurðar um að hæstu laun skuli hækka svona mikið. Það er vegna þess að kjör þeirra hæst launuðustu, annarra en kjararáð úrskurðar um, hafa batnað mikið að undanförnu. Sem er ekki óeðlilegt enda beinlínis afleiðing af stefnu ríkisstjórnar hægriflokkanna.
Forsætisráðherra ætti því að leita skýringa í sínu nærumhverfi, jafnvel að taka það upp á næsta ríkisstjórnarfundi í stað þess að láta eins og hann viti ekki hvernig þessi mál eru vaxin.
Nema hann viti það ekki?