Fólk er ekki fífl ...

Það kennir ýmissa grasa í glærukynningu ríkisstjórnarinnar á millifærslunni. Meðal annars þetta:
20 milljarðar eru færðir beint af tekjuhlið ríkissjóðs í millifærsluna, þ.e.a.s. ríkið (við ) borgum þetta með sameiginlegum tekjum okkar allra (sjá glæru 7).
Skattaafsláttur til viðbótar upp á 20 milljarða króna þýðir niðurskurð í útgjöldum upp á sömu upphæð (sjá glæru 9).
25% millifærslunnar fara til fólks með meira en 16 milljónir í árslaun (sjá glæru 31).
32% af millifærslunni fara til fólks sem er eldra en 56 ára sem er sá aldurshópur sem skuldar minnst og á mest (sjá glæru 43).
45% millifærslunnar fara til fólks sem á meira en 13 milljónir í eigin fé (sjá glæru 41).
30% millifærslunnar fara til fólks sem á meira en 25 milljónir í eigin fé (sjá glæru 42).
Þeir sem geta nýtt sér í botn að greiða lánin sín niður með eigin fé (þeir tekju- og eignamestu) og fá auk þess ekkert frádrag vegna fyrri aðgerða (þeir tekju- og eignamestu) geta fengið niðurfærslu upp á ríflega 20% af skuldum sínum (sjá glæru 47).
Mánaðarlegar afborganir lána þeirra sem mest fá munu geta lækkað um allt að 50 þúsund – árið 2036 – ef verðbólga helst undir 2,5% allt tímabilið og krónan stendur í stað og ekki sé gert ráð fyrir skerðingum vegna fyrri aðgerða (sjá glæru 61).
Á öllum glærum þar sem tekin eru möguleg dæmi um mögulega lækkun lána er tekið fram að ekki sé gert ráð fyrir skerðingum vegna fyrri aðgerða (smáa letrið neðst) sem þýðir að útreikningarnir gefa ranga niðurstöðu (sjá t.d. glæru 54).

Ríkisstjórn hægrimanna virðist líta svo á að fólk sé fífl.
Það eru mikil mistök hjá þeim að ætla það.