Tvö símtöl úr Seðlabankanum

Símtal þáverandi bankastjóra Seðlabankans og þáverandi forsætisráðherra um 80 milljarða króna lán Seðlabankans til Kaupþings í október 2008 hefur verið talsvert til umræðu að undanförnu. En þetta er ekki eina símtalið sem fyrrverandi seðlabankastjóri hljóðritaði án vitundar hins aðilans.
Í viðtali við Viðskiptablaðið segir bankastjórinn fyrrverandi frá því að hann hafi átt símtal við seðlabankastjóra Bretlands þetta sama haust um Icesave-málið. Þar átti sá breski að hafa lofað þeim íslenska að Icesave-krafan yrði ekki innheimt. Sá íslenski sagði að sér hefði „… þótti mjög vænt um að heyra þetta og þakkaði honum vel fyrir.“
Skiljanlega.
Málið vandaðist hins vegar þegar breski bankastjórinn hafnaði alfarið túlkun þess íslenska á samtali þeirra.
Í kjölfarið kröfðust þingmenn sjálfstæðiflokksins þess að fá aðgang að þessu símtali enda trúir sínum gamla foringja. Eftir talsvert múður og mas af hálfu seðlabankastjóra Bretlands féllst hann að lokum á að fjárlaganefnd fengi að lesa útskrift af símtalinu og kynna sér innihald þess. Það var og krafa þess breska að fullur trúnaður yrði um símtalið enda hefði það verið hljóðritað án hans vitundar sem var án fordæma að hans mati.
Nefndarmenn í fjárlaganefnd lásu síðan útskrift af símtalinu og um það ríkir enn trúnaður.
Eftir það þagnaði krafa sjálfstæðismanna um að opinbera símtalið.
Einhverra hluta vegna.