Heróp íslenskra rasista

Samkvæmt mælingum hefur framsóknarflokkurinn verið langt frá því að fá mann kjörinn í borgarstjórn Reykjavíkur. Þrír vænir flokksmenn hafa verið mátaðir í forystusætið án árangurs. Því er nú róið á ný mið eftir atkvæðum. Bara einhverjum atkvæðum. Ef framsóknarflokkurinn fær mann kjörinn í borgarstjórn verður það á atkvæðum hægri öfgamanna. Flokksforystan virðist ætla að þegja það af sér að mestu. Þeim er nokkuð sama um gæði atkvæðanna. Formaður flokksins ætlar að bíða og sjá til hvort rasistar skili ekki flokknum manni í borgarstjórn áður en hann tjáir sig um ömurðina. En hvað ætla góðkynja framsóknarmenn að kjósa? Ætla Björn Ingi Hrafnsson, Guðni Ágústsson, Jónína Bjartmars og Sigrún Magnúsdóttir að láta sig hafa það að kjósa flokkinn undir merkjum forystukonunnar í Reykjavík eins og hægriöfgamennirnir ætla að gera? Er ekki rétt að spyrja þau? 
Heróp íslenskra rasista til stuðnings framsóknarflokknum ætti auðvitað að duga ágætlega menntaðri og skynsamri þjóð til að þurrka flokkinn út í kosningunum á laugardaginn.
En þannig verður það ekki.
Því miður.