Lífróður

Það er kraumandi ólga í stjórnarflokkunum vegna þeirrar andstöðu sem er að magnast upp í þjóðfélaginu gegn ríkisstjórninni. Forystumenn flokkanna reyna nú allt hvað þeir geta til að snúa samfélagsumræðunni sér í hag. Það mun þeim ekki takast með áframhaldandi stappi um ESB umsóknina og svikin loforð í þeim efnum. Þeim hefur heldur ekki gengið vel að fóta sig í fjölmiðlum um þau mál svo ekki sé meira sagt og þykja ótrúverðugir í málsvörninni.
Því er nú allt kapp lagt á að lagafrumvarpi eða frumvörpum um stóru millifærsluna verði hent inn í þingið sem fyrst, jafnvel innan nokkurra daga. Eins má búast við því að Bjarni Benediktsson sýni eitthvað á spilin fyrir laugardaginn í þeirri von að slá á boðuð mótmæli gegn ríkisstjórninni. Með því á að reyna að dreifa athyglinni frá ESB klúðrinu og fá almenning til að tala um annað í þeirri von að samfélagið róist.
En ef marka má hvíslið  hafa efasemdir um það mál þó heldur aukist meðal þingmanna sjálfstæðisflokksins sem finnst mörgum að Flokkurinn hafi tekið nóg á sig í bili fyrir samstarfsflokkinn. Það mun nú vera lagt að þessum þingmönnum að sýna hollustu og trúnað við Flokkinn og hafa hægt um sig þegar frumvörpin koma fram.
Það munu víst ekki allir vera sáttir.
Ef marka má pólitíska hvíslið.