Smá upprifjun um stjórnarskrármálið

Stundum ber orðræðan rökræðuna ofurliði og sögusagnir verða að fljúgandi staðreyndum sem enginn fótur er fyrir. Dæmi um það er að vinstristjórnin hafi svikið þjóðina í því að gera breytingar á stjórnarskránni.
Þegar betur er að gáð á þetta sér enga stoð í raunveruleikanum heldur þvert á móti.
Árið 2010 samþykkti Alþingi lög um stjórnlagaþing. Flutningsmaður lagafrumvarpsins var Jóhanna Sigurðardóttir forsætisráðherra. Lögin voru samþykkt með öllum greiddum atkvæðum gegn einu og 11 hjásetum – allt frá sjálfstæðisflokknum. Þjóðin var síðan boðuð til funda til að ræða væntanlegar breytingar á stjórnarskránni. Stjórnlagaráð var svo kosið í beinni kosningu en kosning var kærð og dæmd ólögmæt vegna tæknilegs ágalla við framkvæmd hennar.
Alþingi samþykkti þá að skipa sérstakt stjórnlagaráð og bauð þeim sem fengið höfðu kosningu  á stjórnlagaþingið að taka sæti í ráðinu. 21 þingmaður lagðist gegn því að stjórnlagaráð yrði skipað, allt þingmenn hægriflokkanna að Lilju Mósesdóttur undanskilinni. Stjórnlagaráð tók til starfa og skilaði Alþingi tillögum sínum að nýrri stjórnarskrá sem þjóðin samþykkti að lagðar yrðu til grundvallar að nýrri stjórnarskrá fyrir lýðveldið Ísland.
Hægriflokkarnir börðust allt síðasta kjörtímabil af hörku gegn breytingum á stjórnarskránni. Undir lokin fengu þeir svo stuðning úr óvæntustu átt þegar þingmenn Hreyfingarinnar lögðu fram vantraust á ríkisstjórn vinstriflokkanna vegna málsins. Báðir formenn hægriflokkanna sögðust myndu styðja vantraustið þótt þeir væru ósammála málatilbúnaðinum á bak við tillöguna!
Rétt eins og hægriflokkarnir komu í veg fyrir breytingar á stjórnarskránni fyrir kosningarnar 2007 og 2009 tókst þeim að stöðva frekari framdrift málsins í þinginu fyrir kosningarnar 2013.
Allt frá upphafi voru það vinstriflokkarnir sem keyrðu málið áfram í þinginu og utan þess. Það var vegna þeirra flokka sem málið komst svo langt sem það komst og það var vegna harðfylgi þingliðs þáverandi ríkisstjórnar sem öll sú góða vinna var unnin við undirbúning að gerð nýrrar stjórnarskrár. Þjóðin ákvað síðan í kosningum vorið 2013 að setja málið í salt þangað til  búið væri að leiðrétta hana.
Síðan hefur ekkert gerst í stjórnarskrármálinu.
Fullyrðingar um að það hafi verið ríkisstjórn vinstriflokkanna sem hafi "svikið þjóðina" um nýja stjórnarskrá eiga sér því enga stoð í raunveruleikanum.